د خوست کرنې ریاست کې سکټوري غونډه دائره شوه
۲۸ غبرګولی ۱۴۰۴ ه.ش
۲۱ ذُو الحِجَّةِ ۱۴۴۶ه.ق
د خوست ولایت دکرنې، اوبولګولو او مالدارۍ ریاست چارواکي وایي، چې ددې ولايت دکرنې ریاست د همکارو بنسټونو، مؤسسو او نهادونو سره د ۱۴۰۴ام کال د دویمې سکټوري غونډې په ترڅ کې، پر بېلابېلو موضوعاتو خبرې اترې وکړې.
د غونډې په پيل کې د خوست دکرنې، اوبولګولو او مالدارۍ ریاست مرستیال مولوی اسلام خان منیب دتېر سکټوري غونډې د ورسپارل شویو اجرااتو لنډه کتنه وکړه، ورپسې دسکټوري غونډې د جوړولو پر اهمیت او هم دسکټوري غونډې پر بناُ د اړوند اداراتو او موسسا تو ترمنځ د ښې همغږۍ په جوړولو خبرې وکړې او زیاته یې کړه: «موږ او تاسو د هېواد او په ځانګړې توګه د خوست ولایت د پرمختګ، بیارغونې، زرغونتیا او سمسورتیا په موخه کار کوو، ترڅو هېواد مو د نورو له احتیاجه خلاص شي، په راتلونکې کې هم همداسې کلکه همغږۍ ولرئ، ځکه د ښې همغږۍ په صورت کې موږ او تاسو کولای شو، چې غوره چوپړتیاوې وړاندې کړو.»
ښاغلی منیب د غونډې ګډونوالو ته په خطاب کې وویل، چې داسې پروژې پلي کړی، چې ولس ته یې بنیادي ګټه ورسېږي ترڅو ولس ته د زیات وخت لپاره مصروفیت پیدا شي. هغه زیاته کړه: «راتلونکې لپاره د بنسټیزو پروژو په پلي کولو کې د سیمې خلکو سره سلا مشورې وکړئ او د دوی اړتیاوو ته په کتو اوږدمهاله، ارزښت لرونکي او بنسټيزې پروژې پلي کړئ.»
خوست ولایت دکرنې ریاست مرستیال دخوست ولایت ته د راستنیدونکو کډوالو د عرایضو په هکله هم معلومات وړاندې کړل، ترڅو پدې برخه کې همکار مؤسسات لازمه مرسته ورسره وکړي، چې د مؤسساتو له لوري د هر ډول همکارۍ ډآډ ورکړل شو.
مولوی اسلام خان منیب د کرنې او مالدارۍ په برخه کې له فعالو مؤسسو د بڼونو، چکډېمونو، کانالونه او سربندونه رغول او ترڅنګ یې د څارویو د نسل اصلاح او نورو مثمرو پروژو غوښتنه وکړه.
په همدې حال کې د مؤسسو استازو په خپل وارسره دکرنې،مالدارې، ځنګلونو او څړځايونو په برخه کې د خپلو فعالیتونو راپور او خپل نظرونه او وړاندیزونه شریک کړل.
د یادوني وړ ده، چې د کرنې سکتوري غونډه په میاشت کي یو ځل د اداراتو او اړونده مؤسسو د لا ښې همغږۍ رامنځته کولو په موخه ترسره کېږي.
