کندهار کې هره ورځ شاوخوا ۸۰۰ سوه ټنه د چرګانو دانه توليدېږي
۲۴ غبرګولی ۱۴۰۴ ه.ش
۱۷ ذُو الحِجَّةِ ۱۴۴۶ه.ق
د کندهار دکرنې، اوبولګولو او مالدارۍ ریاست چارواکي وایي، دغه ولایت کې اوسمهال د چرګانو د دانې تولید نهه کارخونې فعالیت لري، چې په مرسته یې د کندهار ولایت له دې درکه ځان بسیاینې ته نږدې شوی.
د کندهار دکرنې ریاست چارواکي وایي، د چرګانو دانه چې مخکې له ګاونډیو هېوادونو څخه واردېده او ډېری وخت به یې چرګانو ته د ګټې پر ځای زیان رساوه، اوس یې واردات بند شوي دي. اوس نه یوازې کندهار کې فارملرونکي له یادې ستونزې خلاص شوي، بلکې دلته په ټيټه بیه ښه کیفیت لرونکې دانه تولیدیږي، چې دغه ولایت کې د کارولو سربېره د هېواد ډېر شمېر نورو ولایتونو ته هم لېږدول کېږي.
د کندهار دکرنې ریاست د مالدارۍ آمریت اړوند متخصص ډاکټر توریالي آغا وویل: «موږ اوس کندهار کې د چرګانو د غذايي توکو نهه فابریکې لرو، دا فابریکې د هېواد ډېرو ولایتونو ته تولیدات ورکوي.»
د هغه په خبره، دغه ولایت کې د چرګانو د دانې تولید د اوس لپاره د قناعت وړ دی او هره ورځ شاوخوا ۸۰۰ سوه ټنه د چرګانو دانه توليديږي او په مناسب کیفیت او ټیټه بیه بازار ته وړاندې کېږي.
د یادونې ده، له دې مخکې کندهار ته له پاکستانه د چرګانو دانه راوړل کېده، چې د مسوولینو په وینا، بېکیفیته به وه او ډېری وخت به یې چرګانو ته زیان رساوه.
