د کندهار میانشین ولسوالی کې د څه باندې نهه زره ډالرو په لګښت دوه چکډېمونه جوړ او ګټې اخیستنې ته وسپارل شول

د کندهار د کرنې، اوبو لګولو او مالدارۍ ریاست وایي، چې د ملګرو ملتونو دخوړو او کرنې ادارې په مالي او د بشري خیریه مؤسسې «او،اچ،ډبلیو» په تخنیکي همکارۍ ددې ولایت د میانشین ولسوالی د زربیرک او ګنده څاه په سیمو کې د  نهه زره او ۱۵۹ ډالرو په لګښت د اوبو زېرمه کولو دوه چکډیمونه جوړ او ګتې اخیستنې ته وسپارل شول.
یاد چکډېمونه د شاوخوا ۴۰ ورځو په موده کې جوړ شوي، چې د زربیرک چکډیم ۳۸ متره اوږدوالي او دګنده څاه چکډیم ۳۰ متره اوږدوالی لري. د دغو چکډېمونو د جوړېدو په ترڅ کې د یادې ولسوالی لسګونو کسانو ته په فني او غیر فني برخو کې د کار زمینه هم برابره شوې وه.
یاد چکډېمونه به د ژمي د اورښتونو اوبه زېرمه کړي، چې په پایله کې به د میانشین ولسوالی د ځمکې لاندې اوبو کچه لوړه شي. دې سره به د سیمې زرګونو بزګرانو او مالدارانو ته د اوبو دوامداره او خوندي لاسرسی ممکن او د کرنې او مالدارۍ په چارو کې به یې ستونزې په مؤثره توګه حل شي.
په ورته وخت کې د میانشین ولسوالی اوسېدونکي د اسلامي امارت له دې نوښت څخه خوښ دي او وايي، چې د یادو چکډېمونو په جوړېدو سره به د اوبو په برخه کې د دوی ډېرې ستونزې حل شي.
باید وویل شي، چې د کرنې وزارت له خوا د هېواد په کچه د ۱۳۸ چکډېمونو رغنیزې چارې پیل شوي دي، چې ډېری یې بشپړ او ګټې اخیستنې ته سپارل شوي دي.
د کرنې وزارت چارواکي وايي، چې دا ډول پروژې نه یوازې د کرنیزو تولیداتو د زیاتوالي لامل ګرځي، بلکې د سیمې د اوسېدونکو اقتصاد ته هم مثبت بدلون ورکوي.