خوست کې ۶۰ مستحقو بزګرانو ته د جوارو تخمونه، کیمیاوي سرې او د کار وسایل وویشل شول

۲۳ غویی ۱۴۰۴ ه‍.ش
۱۵ ذُو ٱلْقَعْدَةِ ۱۴۴۶ه‍.ق 
د خوست ولایت د کرنې، اوبو لګولو او مالدارۍ ریاست تر چتر لاندې، د تڼیو ولسوالۍ کرنیزو چارو مدیریت او د ځنګلونو بیارغونې او خوړو خوندیتوب پروژې په لړ کې، د دغه ولسوالۍ ۶۰ مستحقو بزګرانو ته د جوارو تخمونه، کیمیاوي سرې او د کار وسایل وویشل شول.
دغه توکي د کرنیزو چارو مدیریت تر مستقیم نظارت لاندې، د کمکۍ مڼې ځنګلونو ساتنې او سمون ټولنې استازیو په حضور کې پر بزګرانو ووېشل شول، چې په ترڅ کې یې هر بزګرته ۳.۵ کیلو ګرامه د جوارو تخم، ۱۰کیلو ګرامه یوریا کیمیاوي سر،پنځه کیلو ګرامه توره کیمیاوي سره، یوه دانه بیلچه، یوه دانه کشک، دوې دانې لورونه، یو ګوټک د رجې تار وېشل شوي دي.
د پروژې له مخې، هر بزګر مکلف دی چې لږ تر لږه په ۳۰۰ متره مربع ځمکه باندې جوار وکري. برسېره پر دې، بزګرانو ته د جوارو د کتاري کرنې، مدیریت او د حاصل زیاتوالي په اړه عملي تریننګ هم ورکړل شو.
د کتاري کرنې موخه دا دی چې د پاشکې کرنې پر ځای، منظم او مؤثر کرنیز سیستم دود شي، څو بزګران وکولای شي له کمه ځمکه څخه زیات حاصل تر لاسه کړي.
د خوست د کرنې، اوبو لګولو او مالدارۍ ریاست وايي، چې دا ډول پروژې به دوام ومومي، څو د سیمې د بزګرانو اقتصاد پیاوړی او د خوړو خوندیتوب تضمین شي.