د پکتیکا کرنې ریاست په انګړ کې د جومات جوړولو د بنسټ ډبره کېښودل شوه
۳ غویی ۱۴۰۴ ه.ش
۲۵ شَوّالُ المُکَرَّم ۱۴۴۶ه.ق
د پکتیکا ولایت د کرنې، اوبولګولو او مالدارۍ ریاست په انګړ کې د یوه جومات د جوړولو د بنسټ ډبره کېښودل شوه. دا مراسم د پکتیکا ولایت د ارشاد، حج او اوقافو ریاست په همغږي ترسره شول، چې پکې د پکتیکا والي مولوي عبدالخالق عابد، د ارشاد، حج او اوقافو رئیس شیخ عیدولي حلیمي او د کرنې، اوبولګولو او مالدارۍ رئیس مولوي محمدزمان عمري ګډون درلود.
یاد جومات به په یوه وخت د سلګونو لمونځکوونکو ظرفیت درلودونکي وي او ټولې اړینې اسانتیاوې لکه اوبه، برېښنا، تشنابونه او نور خدمتونه به ولري.
د مسوولینو په وینا یاد جومات د هغو شپږ جوماتونو له ډلې دی، چې د پکتیکا ولایت مقام د وړاندیز پر بنسټ، د امیرالمؤمنین حفظهالله د لطف او شفقت له مخې منظور شوي دي، چې ودانیزې چارې به یې په نږدې راتلوکي کې عملاً پیل شي.
