د کندهار خاکرېز ولسوالۍ کې د څارویو او کرنیزو ځمکو لپاره د اوبو یو حوض جوړېږي

د کندهار ولایت د خاکرېز ولسوالۍ په سبزل کاریز سیمه کې د څارویو او کرنیزو ځمکو د خړوبولو لپاره د اوبو یو زيرمه‌ییز حوض د څه‌‌باندې ۷۱۳ زره افغانیو په لګښت جوړېږي.
د کندهار د کرنې، اوبولګولو او مالدارۍ ریاست په نوښت، د اروپايي ټولنې په مالي او د هالنډ کمیټې په تخنیکي همکارۍ د خاکرېز ولسوالۍ سبزل کاریز سیمه کې د اوبو د ذخیرې یو پایداره حوض جوړېږي.
د یاد حوض د جوړېدو د پرانیستې په مراسمو کې د خاکرېز ولسوال مولوي سیف الرحمن، د کرنې ریاست او هالنډ کمیټې استازو، یو شمېر محلي مسؤلینو او د سیمې اوسېدونکو ګډون کړی و.
د طبیعي سرچینو آمریت انجینر نورمحمد همکار وايي چې دا حوض به په تخنیکي ډول جوړ شي، چې ۲۰ متره اوږدوالی، ۱۰ متره پلنوالی او ۲ متره لوړوالی به ولري او د ودانیزو چارو بشپړېدو لپاره نږدې یوه میاشت وخت ته اړتیا ده.
په خبره یې، د دې حوض جوړېدو په لړ کې به ۶ فني او ۱۵ غیر فني کسانو ته د کار زمینه هم برابره شي. دا حوض به د سبزل سیمې د کروندګرو او مالدارانو لپاره د اوبو د کمښت ستونزه هواره کړي، چې ۳۰ سلنه اوبه به د کرنیزو ځمکو، او ۷۰ سلنه د څارویو لپاره ځانګړې شي.