د ننګرهار وادي کرنیز امارتي شرکت مسوولینو د سپین خوړ د بیا رغونې له چارو څخه لیدنه وکړه
د ننګرهار وادي کرنيز امارتي شرکت د کرنیزو چارو رئیس، د سوداګرۍ او بازارموندنې رئیس او ځینو نورو مسؤلینو د درېیم فارم د سپین خوړ محافظوي پولو د بیا رغونې له روانو چارو څخه لیدنه وکړه.
د یاد شرکت د کرنیزو او تخنیکي چارو رئیس انجنیر حکمتالله معروف، د سوداګرۍ او بازارموندنې رئیس انجنیر نديالله نيازي، د اوبولګولو تخنیکي ساتنې او څارنې آمر انجنیر ګل احمد چوپان، د درېیم فارم د کرنې مدیر انجنیر عتیقالله او ځینو نورو مسؤلینو په ګډه د یاد فارم اړوند د پنځم او شپږم بلاکونو ترمنځ د سپین خوړ تخریب شویو محافظوي پولو د بیا ترمیم، جوړولو او د رسوباتو پاکولو له روانو چارو څخه کتنه وکړه.
یادو مسؤلینو د لیدنې پر مهال د میکانیزې لوی مدیریت اړوند د تخنیک مدیر عبدالله نعمت فعالیتونه وستایل او د لا ښه پرمختګ په موخه یې ورته لازمې لارښوونې وکړې.
د مسؤلینو په وینا، د یادې لړۍ موخه د سپین خوړ د اوبو د بهیر لوړول، له موسمي سیلابونو څخه د محافظوي پولو ژغورل او د کرنیزو ځمکو د اوبو د زیاتوالي له ګواښ څخه خوندي کول دي.
