پکتیا کې د مڼو نوي بڼوڼه جوړېږي
د پکتیا د کرنې، اوبولګولو او مالدارۍ ریاست چارواکي وایي، چې ددې ولایت، د مرکز ګردیز په ګډون د زرمت او روحاني بابا په ولسوالیو کې د افغانستان لپاره د کلیو پراختیا مؤسسې په همکارۍ، چې مالي ملاتړ یې د ملګرو ملتونو د خوړو او کرنې ادارې «اف،اې،او» پر غاړه لري، ۴۴ بزګرانو ته د مڼو بڼونو جوړولو په پار اړین توکي ووېشل شول.
د پکتیا د کرنې، اوبولګولو او مالدارۍ ریاست رییس مولوي سید امین هاشمي وویل، چې د افغانستان لپاره د کلیو پراختیا موسسې په همکارۍ د دی ولایت د مرکز په ګډون د زرمت او روحاني بابا په ولسوالیو کې ۴۴ تنه بزګرانو ته د مڼو بڼونو جوړولو په پار د مڼو نیالګي او اړین توکي وېشل شوي دي.
همداراز ښاغلی هاشمي وویل، چې په یادو بڼوڼو کې ۱۴ متراکم او ۳۰ عادی د مڼو بڼوڼه شامل دي، چې هر بزګر ته د متراکم بڼ په موخه ۷۰۰ د مڼو نیالګي او د عادي بڼ لپاره ۱۶۰ د مڼو نیالګي ورکول کېږي.
په همدې حال کې د پکتیا دکرنې ریاست تخنیکي ټیم له خوا دغو بزګرانو ته د بڼونو د جوړولو او اوبو لګولو اړوند ضروري معلومات هم ورکړل شول، ترڅو د نیالګیو د ښې ودې او حاصل زیاتوالي ته زمینه برابره شي.
