میدان وردګو کې ۵۸زره وړو شخوند وهونکو څارویو ته د واکسین ورکولو لړۍ پیل شوه 

د میدان وردګو ولایت د کرنې، اوبو لګولو او مالدارۍ ریاست په هڅو، د مالدارۍ او حیواني روغتیا آمریت مسلکي کارکوونکو د ملګرو ملتونو د خوراک او کرنې سازمان اف اې او په مالي ملاتړ، د پي پي آر ناروغۍ د مخنیوي لپاره د واکسین تطبیق کمپاین پیل کړ.
د یاد کمپاین له لارې به د دغه ولایت د کوچیانو او ځایي مالدارانو شاوخوا ۵۸زره وړو شخوند وهونکو څارویو ته د پي پي ار تاعون ناروغۍ ضد واکسین تطبیق شي. دا لړۍ په چک، مرکز، سیدآباد، دایمیرداد، نرخ، جلریز، حصه اول او حصه دوم ولسوالیو کې عملي کېږي.
یاده ناروغي هرکال د دې ولایت زرګونه څاروي له منځه وړي، چې د دې کمپاین په تطبیق سره به د ناروغۍ د خپرېدو مخه ونیول شي. د همدې لپاره، د کرنې ریاست یاد کمپاین پيل کړی، ترڅو د میدان وردګو مالداران له دې زیان څخه خوندي پاتې شي.
د یادولو وړ ده، چې د واکسین کمپاین چارې د کرنې ریاست د مسلکي ټیم لخوا څارل کېږي، ترڅو د کوچیانو او ځایي مالدارانو څارویو ته په سمه او معیاري بڼه واکسین تطبیق او ټولو اړوندو سیمو ته لازم خدمات ورسول شي.