د کندهار سپین بولدک ولسوالۍ کې د نیمه ځنګلي ریګي بوټو د ناقانونه انتقال مخه ونیول شوه
۳۰ کب ۱۴۰۳ه.ش
۲۰ رَمَضانُ المُبارَک ۱۴۴۶ه.ق
د کندهار د کرنې، اوبو لګولو او مالدارۍ ریاست په مشرۍ د سپین بولدک ولسوالۍ د ځنګلونو او څړځایونو د ساتنې مسؤلینو د یادې ولسوالۍ په بېلابېلو سیمو کې د طبیعي، ځنګلي او ریګي بوټو د ساتنې او پرېکولو د مخنیوي کمپاین ترسره کړ.
د دې کمپاین په ترڅ کې د یادې ولسوالۍ په شپږمه ناحیه کې د نیمه ځنګلي ریګي بوټو د ناقانونه انتقال مخه ونیول شوه. مسؤلین وایي چې یو تن غوښتل دا بوټي په غیرقانوني ډول انتقال کړي او د شخصي موخو لپاره یې وکاروي، خو پر وخت اقدام وشو او مخه یې ونیول شوه.
ریګي بوټي د دښتي او ریګي سیمو لپاره ارزښتناک ګڼل کېږي، ځکه چې د دوی ساتنه د هوا ککړتیا کموي، د ریګ د خپرېدو مخنیوی کوي او د سیمې ایکولوژیکي توازن ساتي.
د یادونې وړ ده چې د کرنې ریاست په وروستیو کې د طبیعي بوټو د قاچاق او پرېکولو د مخنیوي لپاره ګڼ شمېر کمپاینونه ترسره کړي دي. دوه ورځې وړاندې هم د سپین بولدک ولسوالۍ پنځمه ناحیه کې د سسي بوټو د ناقانونه انتقال مخه نیول شوې وه.
