خوست ولایت کې د ستروسو ۱۵ بڼونه جوړ شول
د خوست ولایت کرنې، اوبولګولو او مالدارۍ ریاست د کرنیزو چارو آمریت له لوري د دې ولایت په مرکز او ځینو ولسوالیو کې د ستروسو (مالټو) ۱۵ بڼونه جوړ شول.
د کرنې ریاست د معلوماتو له مخې، له دغو بڼونو څخه ۵ د خوست په مرکز، ۳ په صبریو او یعقوبیو، ۴ په تڼیو، ۲ په اسمعیل خیلو او مندوزیو او ۱ بڼ په ګربزو ولسوالیو کې جوړ شوی دی. هر بڼ ته ۱۳۳ د ستروسو نیالګي ورکړل شوي، ترڅو بڼوالۍ ته وده ورکړل شي.
د یادو بڼونو د جوړولو بودیجه د کرنې، اوبولګولو او مالدارۍ وزارت له لوري ځانګړې شوې وه، چې موخه یې د کرنې سکتور پراختیا او د مېوو د تولید زیاتوالی و.
