د کندهار ډنډ کې پر لسګونو بېوزله مالدارانو مرستې ووېشل شوې
۱۴ کب ۱۴۰۳ه.ش
۴ رَمَضانُ المُبارَک ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅه، له جرمونو او مخدره توکو سره د ملګرو ملتونو د مبارزې دفتر (یو. ان. او. ډې. سي) ادارې په مالي ملاتړ، د هالنډ کمیټې په تخنیکي همکارۍ د یوې روڼې او شفافې پروسې له لارې، ۲۵ تنو اړمنو او بېوزله مالدارانو ته د مالدارۍ اړین توکي او د څارویو روغتیا لپاره درمل ووېشل شول.
ددې مرستې په ترڅ کې هر مالدار ته د مایع ګاز ډبه، شېدو راټولولو لپاره فلزي سطل، د شیدو د انتقال لپاره فلزي ډبه، د شیدو مایع کولو لپاره فلزي لوښی (کټوه)، د شلومبو مایع کولو لپاره فلزي غړکه، جالۍ، لوټه، دست کشې، بورس، او همدارنګه د څارویو روغتیا ته د پاملرنې په موخه ۵ قلمه مختلف درمل ورکړل شوه.
د دې مرستې موخه د مالدارانو اقتصادي ملاتړ، د هغوی لپاره د مالدارۍ اړینې اسانتیاوې برابرول، د هغوی اقتصادي وضعیت ښه کول، او د کورنیو اړتیاوو پوره کول دي، ترڅو مالداران وکولای شي له دې مرستې څخه ګټه پورته او خپل اقتصادي ودې ته زمینه برابره کړي.
د یادونې وړ ده، چې څه کم یوه اوونۍ وړاندې د کندهار په پنجوایې ولسوالی کې هم ۲۰ تنه اړمنو مالدارانو سره دې ته ورته مرسته ترسره شوې وه.
