هلمند کي د کبانو ٢٦زره بچیان دروزلو په موخه فارمونو ته واچول شول
٨ کب ۱۴۰۳ه.ش
٢٧ شَعبان المُعَظّم ۱۴۴۶ه.ق
د هلمند ولایت مرکز لښکرګاه کي د کب روزنې فارم لرونکو ټولنې مسؤل له لوري ٢٦زره د کبانو اصلاح شوي بچیان د روزنې په موخه هلمند ته را انتقال شوي وو؛چي د کرني ریاست د مالدارۍ او حیواني روغتیا آمریت د مسؤلینو د لارښووني سره سم فارمونو ته واچول شوه.
د کبانو دغه چوزه (بچیان) مخکي تر دې چي فارمونو ته واچول شي لومړی یې د کرني ریاست اړوند مالدارۍ او حیواني روغتیا آمریت مسلکي کارکوونکو له لوري صحي معاینات او د نسل ارزونه ترسره شوه، وروسته په مسلکي توګه د روزنې په موخه د کبانو فارمونو ته ور خوشي کړل شول.
د هلمند د کرنې ریاست اړوند د مالدارۍ او حیواني روغتیا آمریت کارکوونکو د یادو کبانو د نوي نسل د ښې روزنې او پالنې په برخه کې د دغه فارمونو مسؤلینو ته لازمې لارښونې وکړې.
