د کرنې وزارت لخوا څلورو امارتي ادارو ته ځمکه ولېږدول شوه
۵ کب ۱۴۰۳ه.ش
۲۴ شَعبان المُعَظّم ۱۴۴۶ه.ق
د کرنې، اوبولګولو او مالدارۍ وزارت د اراضۍ لوی رياست لخوا څلورو صنعت او سوداګرۍ، ماليې او د کډوالو او راستنېدونکو چارو وزارتونو او ملي استندرد ادارې (انسا) ته د هېواد په کچه خوست ولایت کې د ګمرک د جوړولو، پنجشېر، غور او بدخشان ولايتونو کې د صنعتي پارکونو، بامیان ولایت مرکز کې د کډوالو لپاره د ښارګوټي د جوړولو او پکتيا ولايت کې د ملي استندرد او ملي خوړو ادارې لپاره د کمپلکس او لابراتوار د جوړولو په موخه ځمکه ولېږدول شوه.
ياده ځمکه د اړوندو ادارو په غوښتنه او وړانديز او د عالیقدر امیرالمؤمنین ( حفظ الله تعالی) د جلا جلا حکمونو په اساس د کرنې وزارت د اراضۍ لوی ریاست لخوا يادو ادارو ته ولېږدول شوه.
د دغو ځمکو د لېږد تړون د کرنې وزارت د اراضي ادارې د ځمکو د انتقال او وېش رییس مولوي سید محمد سعيد او د اړوندو ادارو د مسؤلینو تر منځ لاسليک شو.
