د ننګرهار کانال شرکت د مالدارۍ فارم د شيدې تولیداتو کچه لوړه شوې
۱۶ سلواغه ۱۴۰۳ه.ش
۵ شَعبان المُعَظّم ۱۴۴۶ه.ق
د ننګرهار دکانال شرکت چارواکي وايي، چې ددې رياست اړوند د مالدارۍ فارم، د شیدې د تولیداتو کچه د تېرکال په پرتله لوړه شوې ده. دغه فارم د ورځې لسګونه ليټره تازه شيدې توليدو او بازار ته وړاندې کوي.
د چارواکو په خبره، یاد فارم چې د هډې فارم په ۱۷ جریبه ځمه کې جوړ شوی دی، په دغه فارم کې ۳۰۵ سره څاروي موجود دي، چې په کې غواګانې، خوسکیان او غوایان ... شتون لري، چې له ډلې غواګانو څخه ۵۵ سره غواګانې هره ورځ شېدې ورکوي او د درنو هېوادوالو خدمت ته وړاندې کېږي.
د یاد شرکت د چارواکو په وینا، د فارم څارنه، د حیواناتو مناسب خوراک، او د مالدارۍ دعصري میتودونو کارول د شېدو د ښه تولید او لوړېدواساسي لاملونه دي.
مسوولین زیاتوي، چې په دی میاشت کې به له یاد فارم څخه نږدېلس زره او ۵۰۰ لیتره شېده ترلاسه او د هېوادوالو خدمت ته به وړاندې شي.
دوي وړاندې وايي، راتلونکو میاشتو کې به د شیدو تولید نورهم لوړکړي، ددغه شرکت مسوولین زياتوي، د مالدارۍ صنعت ته د ودې ورکولو لپاره نوي ګامونه اخلي، چې موخه يې د مالدارۍ صنعت وده، د لبنياتو تولید لوړول، او د عصري روزنې له لارې د څارویو ساتنه ښه کول دي .
د کرنې او مالدارۍ متخصصینوپه اند، د مالدارۍ صنعت ته وده ورکول کولی شي د اقتصاد پیاوړتیا ته ګټه ورسوي، همدارنګه که حکومت او خصوصي سکتور په ګډه د مالدارۍ صنعت ته پاملرنه وکړي، نو نه یوازې به مالداران ښه عاید ترلاسه کړي، بلکې د سیمې اقتصاد به هم پیاوړی شي.
اوسمهال په دغه فارم کې بېلابېل فعالیتونه روان دي، چې په کې څلورګونو فارمونو کې شته بڼونو ته حېوانې سرې لېږل، د غوجلو پاکول، منظمه خوراک تهیه او نورې اړينې چارې شامل دي، چې ورسره په دې فارم کې لسګونو کسانو ته دکار زمینه برابره شوې ده.
