د کندهار پنجوايي کې زرګونو څارويو ته د طاعون واکسین تطبیق وشو
د کندهار ولایت د کرنې، اوبو لګولو او مالدارۍ ریاست په هڅه او د ملګرو ملتونو د خوړو او کرنې ادارې په همکارۍ، د پنجوايي ولسوالۍ نهه زره کوچنیو څارویو ته د طاعون ناروغیو د مخنیوي واکسین تطبیق شو. دا لړۍ د مالدارۍ آمریت تر مستقیمې څارنې او د پنجوایي ولسوالۍ د کرنې او مالدارۍ مسؤلینو په تطبیقي همکاري ترسره شوه.
د دې واکسین تطبیق موخه د مالدارانو ملاتړ، د مالدارۍ سکتور وده او پراختیا، د څارویو محصولاتو زیاتوالی، د څارویو روغتیا ته پاملرنه او مسلکي کسانو ته کاري فرصتونه برابرول دي.
د پنجوایي ولسوالۍ مالدارانو د دې همکارۍ هرکلی کړی او د کرنې ریاست او اروپایي ټولنې د هڅو څخه یې خوښي څرګنده کړې.
د مالدارۍ سکتور روغتیا ته ځانګړې پاملرنه د څارویو د ناروغیو مخنیوي او د محصولاتو د ښهوالي لپاره اړینه ده. د یادونې وړ ده چې یوه اونۍ وړاندې د کندهار غورک، پنجوايي او ارغستان ولسوالیو کې هم زرګونو کوچنیو څارویو ته ورته واکسین تطبیق شوی و.
