د کندهار بولدک ولسوالۍ کې د ۲۷۰ کیلو بېکیفیته غوښو قاچاق مخه ونیول شوه
۱۲ لېندۍ ۱۴۰۳ه.ش
۱ جُمَادَى الثاني۱۴۴۶ه.ق
د کندهار د کرنې، اوبو لګولو او مالدارۍ ریاست؛ د سپین بولدک ولسوالی د کرنې او مالدارۍ قرنطین مسؤلینو او امنیتي ځواکونو سره په کډه همکارۍ د سپین بولدک فرضي کرښې له لارې د پلمیتو په منځ کې د۲۷۰ کیلو ګرامه د غوایې بی کیفیته او بی هویته غوښو د قاچاق مخه ونیوله.
د یادې ولسوالی د کرنې او مالدارۍ قرنطین چارواکي وویل: «یو تن غوښتل د غوایې یاده غوښه د سپین بولدک فرضي کرښې له لاري د پلمیټو پارسلونو په منځ کې په قاچاقي ډول کندهار ښار ته را انتقال کړي، او وروسته یې د خوراک په منظور پر یو شمېر خوراک پلورنځیو، غوښه پلورنځیو (قصابیو) او هوټلونو وپلوري. چې د بولدک ولسوالی د کرنې او مالدارۍ قرنطین مسؤلینو او امنیتي ځواکونو په همغږۍ یې د قاچاق مخه ونیول شوه.»
د کندهار دکرنې او مالدارۍ ریاست د خوراک پلورنځیو، هوټل لرونکو او ښاریانو څخه غوښتنه کوي، چې په غوښه پلورنځیو (قصابیو) کې تازه غوښۍ وپیري. او د چمتوشوې کوفتي او غوښو پیرولو څخه ډډه وکړي.
د یادونې وړ ده، چې په دې وروستیو کې د کندهار دکرنې ریاست او امنیتي مسؤلینو د بی کیفیته غوښو د قاچاق په وړاندې زیاته پاملرنه کړي. چې په ترڅ کې یې تېره اوونۍ هم په کندهار سپین بولدک فرضي کرښې له لارې د ۳۷۰ کیلوګرامه بی کیفیته د چرګ غوښو د قاچاق مخه نیولي وه.
