هلمند کې د خرما بڼونو د ودې هڅې زیاتې شوې دي

۳۰ لړم ۱۴۰۳ هـ.ش
۱۸ جُمَادَى الأول ۱۴۴۶ هـ.ق
په دې وروستیو کې د هلمند ولایت کرنې، اوبو لګولو او مالدارۍ ریاست هڅې پیل کړې، ترڅو بزګرانو ته د اصلاح شويو نیالګیو په اړه عامه پوهاوی ورکړي او هغوی ته وهڅوي چې په خپلو ځمکو کې د خرما بڼونه جوړ کړي او له دې لارې خپل اقتصاد پیاوړی کړي.
د کرنې ریاست د لارښونو په تعقیب، یو شمیر بزګرانو په خپلو ځمکو کې د خرما بڼونو جوړولو ته لېوالتیا وښوده. په دې لړ کې، نن ورځ د هلمند ولایت د واشیر ولسوالۍ یو بزګر په خپل شخصي لګښت ۲۰ جریبه ځمکه کې د خرما نوی بڼ جوړ کړ، ترڅو په راتلونکي کې ترې د پام وړ عاید ترلاسه کړي.
د خرما د بڼ جوړولو پرانیستې ته د کرنې ریاست اړوند آمر احمد محب، د تخمونو د تصدیق آمر انجنیر امان الله تسکین، او د بوټو ساتنې مدیر ماسټر نجیب الله حکیمي په ګډون د ولسوالۍ اړوند چارواکي هم ورغلي وو. دوی بزګر ته د اړینو مشورو ترڅنګ په راتلونکي کې د همکارۍ ډاډ ورکړ.
تېر کال، د هلمند په مرکز لښکرګاه ښار او ناوې، نوزاد، موسی کلا، او ګرمسېر ولسوالیو کې د کرنې ریاست په ۱۰ جریبه ځمکه کې د خرما ننداریز او آزمایښتي بڼونه جوړ کړل، ترڅو بزګران وهڅوي چې په خپلو ځمکو کې د خرما بڼونه جوړ کړي.
د کرنې ریاست د هغو بزګرانو ملاتړ کوي چې د خرما بڼونه لري یا غواړي جوړ یې کړي. دوی ته د بڼونو روزنې او پالنې په برخه کې مسلکي زده کړې او کرنیز توکي ورکول کېږي، او دا ډول مرستې به په راتلونکي کې هم دوام ولري.