کندهار کې د شاتو مچیو فارمونو د ثبت او راجستر لړۍ پیل شوه
۷ تله ۱۴۰۳ه.ش
۲۵ رَبِیعُ الْأَوَّل ۱۴۴۶ه.ق
د کندهار د کرنې، اوبو لګولو او مالدارۍ ریاست د مالدارۍ آمریت په نوښت، د شاتو مچیو فارمونو د ثبت او راجستر پروسه د کندهار ښار ۵، ۶، ۱۰ او ۱۱ ناحیو او همدارنګه د ډنډ ولسوالی کې پیل شوه.
د کندهار دکرنې ریاست د مالدارۍ آمریت چارواکي وایي، چې د شاتو مچیو د فارمونو دا سروې به په نورو ولسوالیو لکه ارغنداب، دامان، ژړۍ، او پنجوایي کې هم دوام ولري. د دې سروې موخه دا ده چې د فارمونو دقیق شمېر معلوم او د شاتو د تولید کچه ښه مدیریت شي.
د مالدارۍ مسؤلینو په وینا، په راتلونکې کې به د نورو ولایتونو فارم لرونکو ته د شاتو مچیو د فارم فعالیت جوازونه ورکړل شي، خو په ځانګړې ډول به لومړیتوب د سیمهییزو فارم لرونکو ته ورکول کېږي.
دغه پرېکړه په داسې حال کې شوې ده چې د نورو ولایتونو څخه راوړل شوې عبوري مچۍ د سیمې ځایي فارمونو ته زیان رسوي او د شاتو په تولید کې خنډونه رامنځته کوي.
همدارنګه، د شاتو مچیو د فارمونو د ثبت او راجستر له بشپړېدو وروسته، به د شاتو مچیو د فارم لرونکو ترمنځ د اتحادیې د جوړولو په موخه شفاف انتخابات ترسره شي. دغه اتحادیه به د شاتو فارمونو د پرمختګ، د شاتو تولید، صادراتو او کنټرول چارې پر مخ وړي.
