لوګر کې زرګونه څارویو ته د لمپي سکین وقایوي واکسین د تطبیق پروګرام پیل شو
۲۸ وږی ۱۴۰۳ه.ش
۱۵ رَبِیعُ الْأَوَّل ۱۴۴۶ه.ق
د لوګر د کرنې، اوبولګولو او مالدارۍ ریاست په همغږۍ او د ملګرو ملتونو د کرنې او خوړو نړۍوال سازمان په مالي همکارۍ د مرکز او ولسوالیو څارویو ته د لمپي سکین (ال اس ډي) وقایوي واکسین د تطبیق پروګرام پیل شو.
د لوګور ولایت د کرنې ریاست د کرنې او مالدارۍ ریاست د مالدارۍ څانګې آمر داکتر خانشرین خسروی وویل، چې د لمپي سکین واکسین د کرنې او خوړو نړۍوال سازمان په همکارۍ د مرکز پُل علم او ولسوالیو د مالدارۍ فارم لرونکو څارویو ته چمتو شوی دی، چې په ترڅ کې به یې ۵۵۰۰ غټ او واړه څاروي واکسین شي.
نوموړي زیاته کړه، چې د دې پروګرام موخه د اړمنو مالدارانو ملاتړ او د څارویو وقایوي درملنه ده، ترڅو څاروي د پوستکي د دانو له ناروغۍ څخه خوندي شي. هغه یادونه وکړه، چې په نږدې راتلونکي کې به د کرنې او خوړو نړۍوال سازمان په همکارۍ دغه واکسین په پاتې ولسوالیو کې هم پلي شي.
د لوګر دکرنې رییس مولوی عبدالرؤف سعید د لوګر له ټولو مالدارانو غواړي، چې د واکسین د تطبیق په برخه کې دې له سیمه ییزو ډاکټرانو سره همکاري وکړي، ترڅو دا پروسه په ښه توګه ترسره شي.
