خوست کې د ځنګلونو خوندیتوب په پار هڅې؛ اړوندو چارواکو سره ناسته وشوه
د خوست دکرنې، اوبولګولو او مالدارۍ ریاست ددې ولایت د ځنګلونو او طبیعي سرچینو د خوندیتوب په موخه د هلوځلو په دوام د ځاځی میدان ولسوالی چارواکو سره دځنګلونو د قطع مخنیوي په موخه ناسته وکړه.
ددې ناستې په ترڅ کې د خوست دکرنې ریاست چارواکو په خپلو خبرو کې وويل، چې د ځنګلونو ساتنه د کرنې رياست له لومړيتوبونو څخه ده او چا ته اجازه نه ورکوي چې ددې ولايت ځنګلونه تخريب او له منځه ولاړ شي، نوموړي مشرانو ته په ټينګار سره وويل، چې هر څوک د لمدو لرګيو په پېر، پلور او قاچاق ونيول شول د قانون منګولو ته یې وسپارۍ او د ځنګلونو خوندیتوب په پار خپلې هلې ځلې کړندۍ کړئ.
