بغلان کې سلګونو مالدارانو سره د څارویو د خوراکي توکو مرسته وشوه

د بغلان دکرنې، اوبولګولو او مالدارۍ ریاست؛ د افغانستان لپاره د هالنډ کمېتې په تخنیکي همکارۍ او دکرنې پراختیا نړۍوال وجهي صندوق په مالي مرسته ددې ولایت د پنځو ولسوالیو( پلخمري، ډنډ غوري، مرکزي بغلان، دوشي او بورکې) پر ۳۰۰ مالدارانو د څارویو خوراکي توکي وېشلي دي.
 د بغلان دکرنې، اوبولګولو او مالدارۍ ریاست چارواکي وویل، چې ددې پروسې په لړ کې هر مالدار ته چې لږ تر لږه څلور څاروي لري د څارویو ۱۰۰ کیلوګرامه خوراکي توکي ورکړل شوي دي.
د دوی په ټکو دغه پروګرام په بغلان کې د مالدارانو د لاس نیوی، د مالدارۍ سکټور د پیاوړتیا او د لبني محصولاتو د زیاتوالي په خاطرترسره کېږي.
ویل کېږي برابرشوي خوراکي توکي له زیاتوتغذیه کوونکو توکوڅخه جوړ شوي دي، چې د وزو، وري او غوا په چاقولو کې به اساسي رول ولري.