زابل کې د ۸ چکډېمونو د بیارغونې چارې پيل شوې
۲۶چنګاښ ۱۴۰۳ه.ش
۱۰ مُحَرَّمُ الحَرام ۱۴۴۶ه.ق
د زابل دکرنې، اوبولګولو او مالدارۍ ریاست چارواکي وایي، چې ددې ولایت د مرکز قلات او شهرصفاه ولسوالی کې د ۸ چکډېمونو د بیارغونې چارې پیل شوي دي.
د زابل دکرنې ریاست د چارواکو په خبره ددې ولایت مرکز قلات او شهر صفاه ولسوالی کې د «او،آر،ډي» مؤسسې په همکارۍ د ۱۶ زره امریکایي ډالرو په لګښت د ۸ چکډېمونو د بیارغونې چارې پیل شوي دي، چې رغنیزې چارې به یې دیوې ماشتې په موده کې بشپړې او ګټې اخیستنې ته به وسپارل شي.
د یادو چک ډېمونو په بیارغونې سره به له یوخوا د خاورې د تخریب مخینوی وشي او له بلې خوا به د باران او سېلابونو اوبه ذخیره شي.
د زابل ولایت د کرنې، اوبولګولو او مالدارۍ ریاست چارواکي وایي، چې ددې پروژې په پلي کېدو سره به د باران اوبه کنټرول شي او د ځمکې د سطحې پر اوبو به هم ښه اغیز ولري، ددې ترڅنګ د کاریزونو او څاګانو په اوبو به هم اغېز کوي د کوچیانو مالونو ته هم اوبه چمتو کوي او د خاورې د تخریب مخه نیسي.
