غزني کې د نیالګیو کېنولو کمپاین پیل شو
۱ وری ۱۴۰۳ه.ش
۱۰ رَمَضانُ المُبارَک ۱۴۴۵ه.ق
د غزنې دکرنې، اوبولګولو او مالدارۍ ریاست له خوا د یاد ولایت په کچه د ۱۴۰۳ لمریز کال د نیالګیو کېنولو کمپاین د سمسور هېواد تر عنوان لاندې پیل شو.
دنيالګیو د کېنولو د کمپاین د پرانیستې پر مهال د غزني سرپرست والي الحاج حافظ محمد امین عمري د بوټو او نيالګيو په کېنولو خوښې وښوده او له اړوند اداراتو او ولسونو یې وغوښتل، چې د نيالګيو او بوټو په ساتنه او پالنه کې له اړوندو ادارو سره همکارۍ او د هېواد زرغونتیا ته پاملرنه وکړي.
دغزني ولایت دکرنې، اوبولګولو او مالدارۍ رییس مولوي محمد ادریس حنیف وویل، چې یاد ریاست په پام کي لري، ترڅو ددې کمپاین په ترڅ کې د غزني په مرکز او ولسوالیو کې نږدې دوه میلیونه مېوه لرونکي او بې مېوې نیالګي وکري.
ښاغلي حنیف د نیالګیو کېنولو په ارزښت هراړخیزې خبرې وکړې او یاد کمپاین یې د هېواد د سمسورتیا او ښکلا په موخه ګټور وګڼل او له اړوندو ادارو او خلکو څخه یې وغوښتل، چې د نیالګیو کېنولو ترڅنګ د نیالګو او ونو ساتنې او پالنې ته ډېره پاملرنه وکړي.
د یادونې وړ ده چې په دغه کمپاین کې د ملکي او نظامي ادارو مسؤلینو، قومي مشرانو، ښاریانو او ځوانانو ګډون کړي ؤ.
دا په داسې حال کې ده، چې دکرنې وزارت له خوا د ۱۴۰۳ کال د نیالګیو کښېنولو کمپاین پیل شوی، چې په ترڅ کې به یې د هېواد د زرغونتیا لپاره په میلیونونو نیالګي کښېنول شي.
