دهلمند مرکز لښکرګاه د نیالګیو روزنځای کې د نارنجو بزغلي کرل کېږي
۲۴ کب ۱۴۰۲ه.ش
۴ رَمَضانُ المُبارَک ۱۴۴۵ه.ق
دهلمند ولایت د کرنې، اوبولګولو او مالدارۍ ریاست لخوا، د طبیعي سرچینو آمریت اړوند مرکز لښکرګاه د بولان د نیالګیو روزنځای کې د نارنجو لس زره نیالګیو د روزلو لړۍ پیل شوی دی.
ددې پروسې په لړ کې دنارنجو د کرنې په موخه په لس زره پلاستیکي کڅوړو کې د نارنجو باکیفیته تخمونه کرل کېږي، چې یاد تخمونه د مسلکي کارکؤنکو لخوا سږکال تر روزنې لاندې نیول کېږي او راتلونکي کال ته یې نیالګي وېشلو ته چمتو کېږي.
سږکال د هلمند د کرنې ریاست اړوند دطبیعي سرچينو آمریت مسلکي کارکوونکو لخوا د نیالګیو په یاد روزنځای کې د بېلابېلو مېوه لرونکو نیالګیو ترڅنګ ډول ډول زینتي نیالګي تر روزنې لاندې دي، چې راتلونکي کال ته به ورڅخه زرګونه باکیفیته نیالګي د بڼوالو لپاره چمتو شي.
دهلمند ولایت د کرنې ریاست په دې وروستیو کې هڅې راپیل کړي دي، ترڅو د تخمونو د اصلاح او تکثیر په برخه کې هلمندوال پر ځان بسیا او په کور دننه د بڼوالۍ سکتور ته وده او پراختیا ورکړي، چې په دې برخه کې تر دې مهاله ګڼې لاسته راوړنې لري.
