د کندهاردکرنې رییس د ملګرو ملتونو دخوړو اوکرنې ادارې چارواکو سره وکتل 

دکندهار دکرنې، اوبولګولو او مالدارۍ رییس الحاج مولوی فضل الباري فضلي په افغانستان کې د ملګرو ملتونو دخوړو او کرنې ادارې د سرچینو رییس الیکس، د رییس سلاکار، په افغانستان کې د ملګروملتونو د خوړو او کرنې ادارې د بېرړنیو مرستو مسوول احمد فیروز آرین سره د خپل کار په دفتر کې وکتل او پر بېلابېلو موضوعاتو خبرې اترې وکړې.
ددې غونډې په ترڅ کې د کندهار دکرنې رییس الحاج مولوی فضل الباري فضلي په افغانستان کې د ملګرو ملتونو د خوړو او کرنې ادارې له چارواکو مننه وکړه، چې تل یې ددې ولایت د کرنې ریاست، بزګرانو او مالدارانو سره مرستې او همکارۍ کړي دي.
ښاغلی فضلي د کندهار دکروندګرو او بڼوالو ستونزې او ننګونې له یادو چارواکو سره شریکې کړل او دوی ته یې ډاډ څرګند کړ، چې دکندهار دکرنې ریاست په هره برخه کې له دوی سره همکار او د دوی د پروګرامونو په پلي کولو کې همکاري کوي.
په همدې حال کې په افغانستان کې د ملګرو ملتونو دخوړو او کرنې ادارې د سرچینو رییس الیکس د کندهار ولایت لپاره د یادې ادارې پلانونه او طرحې د کندهار دکرنې رییس ته وړاندې کړل. هغه دغه راز په خپلو خبرو کې وویل: «هڅه کوو ترڅو په تړۍوالو غونډو کې د افغانستان لپاره د مرستو لړۍ روانه وساتو. په نړوۍوالو کنفرانوسونو کې مو په ځلونو په مرستندویو بنسټونو غږ کړئ، چې افغانان مه هېروئ او له دوی سره په هره برخه کې مرستې وکړئ.» 
دغه راز په دې غونډه کې د مالدارۍ په برخه کې هم ستونزې او ننګونې له یادو چارواکو سره شریک او له دوی څخه وغوښتل شو، چې په یاده برخه کې د مالدارانو لپاره د مرستې زمینه برابره کړي، چې د یادو چارواکو له خوا دهمکارۍ ډاډ ورکړل شو.