کندز کې پر ۲۶۰ بزګرانو د کورنیو باغچو اړونده توکي ووېشل شول
د کندز د کرنې، ابولګولو او مالدارۍ ریاست د «او اچ ډبلیو» مؤسسې په همکارۍ ددې ولایت د مرکز مسکین آباد او ابراهیم خېلو کلیو کې پر ۲۶۰ ګټه اخیستونکو د کورنیو باغچو اړوند ډوله توکي او کرنیز تخمونه وېشلي دي.
ددې مرستې په لړ کې د مسکین آباد او ابراهیم خېلو کلیو پر ۱۹۹۰ کروندګرو د کورنیو باغچو اړونده توکي وېشل شوي دي.
د کورنیو باغچو اړونده دا توکي د غیر موسمي سبو د تولید، مېرمنو ته د کارموندنې، د مېرمنو ونډه د دوی د کورنیو په اقتصادي غوړېدا او د خوراکي تنوع په پار پر دغو بزګرانو وېشل شوي دي.
د کندز ولایت د کرنې ریاست وایي، چې د دغو توکو له وېشلو څخه موخه، د غیرموسمي سبو کښت او تولید دي چې، په عملي کېدو سره یې مېرمنو او بېوزله بزګرانو ته د کار زمینه برابره او د دوی د کورنیو د اقتصادي ودې لامل کېږي.
