خوست کې د ځنګلونو د بیارغونې په پار د چهارمغزو قوریې جوړېږي
١۹ لیندۍ ۱۴۰۲ه.ش
۲۷جُمَادَى الأول ۱۴۴۵ ه.ق
دخوست دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې په همکار ددې ولايت د صبريو، باک او ځاځيميدان ولسواليو د ځنګلونو او څړځايونو د ساتنې او بيا رغونې په موخه په يادو ولسواليو کې د چهارمغزو قوريو د جوړولو چارې پیل کړي دي.
د خوست دکرنې ریاست د چارواکو په خبره ددغو قوریو د جوړولو په پار ددې ریاست اړوند تخنیکي ټیم یادو ولسوالیو ته د سفر په ترڅ کې د سیمې خلکو او بزګرانو سره په لیدنه کې د قوریو جوړولو پر اهمیت خبرې وکړې او بزګرانو ته د قوریو جوړولو په پار عملي روزنه ورکړل او ترڅنګ یې پر یوشمېر بزګرانو د قوریو جوړولو په پار د چهارمغزو تخمونه هم ووېشل.
د چارواکو په خبره ددې پروګرام په لړ کې پر ۲۸ بزګرانو د چهارمغزو ۱۵۴۰ کیلوګرامه تخمونه وېشل شوي دي، چې ورسره به ځنګلونو ته نږدې ۲۸ داسې قوریې جوړې شي، چې هر یوه به یې له (۳۵۰۰-۴۰۰۰) پورې د نيالګيو د توليد ظرفيت ولري او شاوخوا دوه کاله وروسته به له دې قوريو څخه (۱۰۷۵۰۰) نيالګي ترلاسه او د ټولنيزو اشرونو له لارې به اړونده ځنګلونو ته انتقال او نتيجه کې به یې (۲۶۹۵) جريبه نوی ځنګل ورغول شي.
