د ننګرهار کانال شرکت د مالټو حاصلات ډېر شوي
۷ لیندۍ ۱۴۰۲ه.ش
١۵جُمَادَى الأول ۱۴۴۵ ه.ق
د ننګرهار کانال شرکت چارواکي وایي، چې سږ کال ددې کانال په سیمه کې د مالټو حاصلات د تېرکال په پرتله ۵۰ سلنه ډېر شوي دي.
د ننګرهار کانال شرکت رییس مولوی غلام الرحمن کظیم وایي، چې د ننګرهار کانال شرکت به لسګونه جریبه ځمکه د مالټې بڼونه شتون لري، چې سږ کال یې د حاصلاتو کچه د پام وړ زیات شوي دي. ښاغلی کظیم ددې ولایت د مالټو د ډېرښت لاملونه د نوي بڼونو حاصل ته رسېدل وبلل.
مولوی غلام الرحمن کظیم وویل، چې د ننګرهار کانال شرکت د مالټې سږني حاصلات به نږدې درې زره ټنو ته ورسېږي، دا په داسې حال کې ده، چې تېرکال ددغه ولایت د مالټو حاصلات دوه زره مټریک ټنه ښودل شوې وه.
د ننګر په ولایت کې د مالټو ډېر بڼونه شته او خلک په خپلو کورونو او کروندو کې د مالټې ونې اېښي دي او يا دمالټې بڼونه یې جوړ کړي دي، خو په تېرو څو کلونو کې د کرنې وزارت له خوا په دې ولایت کې د مالټو یوشمېر معیاري او سوداګریز بڼونه هم جوړ شوي دي.
د افغانستان ختیځ ننګرهار، لغمان او کونړ ولایتونه مدیتراني اقلیم او د مالټو، نارنج او لیمو بڼونو لپاره مناسبه هوا لري.
