پکتیکا کې د اوبولګولو د یوې پروژې رغنیزې چارې پیل شوې
٢۳ تله ۱۴۰۲ه.ش
۱ ربیعالثاني ۱۴۴۴ ه.ق
د پکتیکا دکرنې، اوبولګولو او مالدارۍ ریاست له خوا ددې ولایت د ارګون ولسوالی د عایشې د کلي د سربند پروژې رغنیزې چارې د یوې غونډې په ترڅ کې پیل شوې.
په دې اړه جوړه شوې غونډه کې دکرنې، اوبولګولو او مالدارۍ وازرت د کرنې او مالدارۍ مرستیال مولوی صدراعظم عثماني، د اوبولګولو د نویو ټکنالوژیو رییس مولوی زین الدین حسام، د پکتیکا دکرنې رییس مولوی شېر محمد ذبیح او یوشمېر نورو سیمه ییزو چارواکو شتون درلود.
د غونډې په پیل کې د کرنې وزارت دکرنې او مالدارۍ مرستیال مولوی صدراعظم عثماني د اوبولګولو د پروژو پر اهمیت خبرې وکړې او دایې د هېواد دکرنې په برخه کې یوه لویه لاسته راوړنه وبلل. ښاغلی عثماني دغه راز وویل، چې دکرنې وزارت ژمن دی، چې د هېواد په لر او برکې د اوبو مدیریت په پار هلې ځلې وکړي او د بزګرانو او بڼوالو د اوبو د کمښت د ستونزو د هوارۍ په پآر د اوبولګولو پروژې پلي کړي.
په ورته وخت کې د پکتیکا دکرنې رییس مولوی شېر محمد ذبیح وویل، چې یاد سربند د ۴.۳ میلیونه افغانیو په لګښت دکرنې وزارت د پراختیایي بودیجې له لارې جوړېږي.
د چارواکو په خبره ددې پروژې ټولیز لګښت ۴.۳ میلیونه افغانۍ ده. یاده پروژه کې د ۲۸۴ متره په اوږدوالی او ۹متره لوړوالی سربند شامل دي، چې په پاخه او اساسي ډول رغول کېږي، چې ورسره سلګونه جریبه کرنیزه ځمکه خړوبېږي.
د پکتیکا دکرنې، اوبولګولو او مالدارۍ رییس مولوی شېر محمد ذبیح د تطبیق کوونکي پروژې له مسؤلینو څخه وغوښتل، چې د پروژې چارې په سمه توګه پلي او په دې برخه کې نه ستړې کېدونکي هڅې وکړي، چې یاده پروژه پر خپل وخت پای ته ورسېږي.
په ورته وخت کې ذبیح د سیمې له خلکو وغوښتل چې د پروژې په ساتنه کې بشپړه همکاري وکړي نوموړی د سیمې خلکو ته ډاډ ورکړ چې هڅه کوي ترڅو د همکارو مؤسسو له لارې د اوبولګولو پروژو سربېره د سبو او غله جاتو په برخو کې داصلاح شویو تخمونو دتوزیع پروګرامونه پلي کړي.
