د کورني اقتصاد پیاوړتیا په پار هڅې؛ ننګرهار کې پر ۱۵۰۰ مېرمنو د کورنیو باغچو لپاره اصلاح شوي تخمونه وېشل کېږي
۶ وږی ۱۴۰۲ه.ش
۱۱ صَفَرُ المُظَفَّر ۱۴۴۵ه.ق
د ننګرهار د کرنې، اوبولګولو او مالدارۍ ریاست په هڅو د اکشن ایډ په تخنیکي همکارۍ او د ملګرو ملتونو د خوړو او کرنې ادارې په مالي لګښت ۱۵۰۰ هغه مېرمنو ته چې د کورنۍ د ګټې وټې مسولیت ور تر غاړې دي د کورنیو باغچو لپاره اصلاح شوي تخمونه او کرنیز وسایل ورکول کېږي.
دننګرهار د کرنې، اوبولګولو او مالدارۍ رییس مولوي عبدالستار محمد وویل، چې د اکشن آیډ مؤسسه د ننګرهار په لعلپوري، ګوشتي او شینوارو لسوالیو کې ۱۵۰۰ کونډو او بېوزله مېرمنو ته د سبو اصلاح شوی تخمونه او نور اړونده لازم وسایل ورکوي .
د ننګرهار دکرنې رییس په خبره د سبو تخمونو کې د شلغم، ګلپي، بېنډۍ، توربانجان، رومي بانجان او ملۍ اصلاح شوي تخمونه او کرنیزو وسایلو کې لور، رمبي، بېلچه، تسکوره او پنجي کش ورکول کېږي.
وړاندې تردې هم اکشن آیډ مؤسسه سلګونو مېرمنو ته په ننګرهار کې اصلاح شوي تخمونه، کرنیز وسایل او کورني چرګان د ورځني اړتیاوو پوره کولو په موخه ورکړې وه.
