د ننګرهار دوو ولسوالیو کې یوشمېر بزګران وروزل شول
۵ وږی ۱۴۰۲ه.ش
۱۰ صَفَرُ المُظَفَّر ۱۴۴۵ه.ق
د ننګرهار د کرنې، اوبولګولو او مالدارۍ ریاست اړوند د بوټو ساتنې مدیریت کارکونکو له لورې د دې ولایت د بټي کوټ او شېرزادو ولسوالیو په شبدیانو، سه پای، او شېرزادو ماما خيلو کې ۳۰ تنو کرونده ګرو ته سبو او جوارو د ناروغیو په برخه کې روزنه ورکړل شوه.
د ننګرهار ولایت د بټي کوټ او شېرزادو ولسوالیو د بوټوساتنې مدیریتونو له لورې ۳۰ تنو بزګرانو ته د رومیانو، سپږۍ، افاتو، جوارو د تني چینجۍ، هرزه وښو مخنیوي، د سبو او نورو بوټو کې د ناروغیو او افاتو د هراړخیز کنټرول په موخه روزنه ورکړل شوې ده.
دغه راز په يادو ولسوالیو کې بزګرانو او بڼوالو ته په بڼونو کې د کیمیاوي درملو استعمال، د ژغورنې احتیاطي تدابېر، د درملو زیانونو او ګڼو نورو برخو کې روزنه ورکړل شوه.
د ننګرهار د کرنې، اوبولګولو او مالدارۍ ریاست هڅه کوي، چې د خپلو متخصصینو پر مټ بزګرانو او بڼوالو ته د ناروغیو او افاتو په اړه پر وخت معلومات وړاندې کړي، ترڅو د ناروغیو مخنیوي ووشي او بزګران له زیانونو خلاص شي.
