د ځنګلونو د پري کولو د مخنیوي په پار هلې ځلې
دکرنې، اوبولګولو او مالدارۍ وزارت د هېواد په کچه د ځنګلونو د پرې کولو مخنیوي او د ځنګلي سیمو د پراختیا په پار هلې ځلې چټکي کړي دي.
ددغو هلو ځلو په دوام د کرنې وزارت مسلکي مرستیال مولوی صدراعظم د ننګرهار د کرنې ریاست په مقر کې د ننګرهار او لغمان ولایتونو د یو شمېر ولسوالیو د قومي مشرانو سره د ځنګلونو د قطع کولو او د شنو لرګیو د قاچاق د مخنیوي په موخه وکتل.
په دې کتنه کې د کرنې وزارت دکرنې او مالدارۍ مرستیال مولوی صدراعظم وویل:«ځنګلونه زموږ ملي شتمني ده او ساتل يې پر موږ لازمي دي. د افغانستان اسلامي امارات د دغه ملي شتمنۍ په ساتنه کې هوډ کړئ او هیچا ته به اجازه ورنکړي، چې ځنګلونه پرې او لرګې يې قاچاق کړي.
مولوی صدراعظم قومي مشرانو ته د ځنګلونو او ټالونو څخه د وچو لرګیو د ایستلو اجازه هم ورکړه، خو د تازه ونو وهل او لرګې قاچاق کول په کلکه بند کړه او زیاته يې کړه چې عاملین به یې د قانون منګلو ته وسپارل شي او قانونې چلند به ورسره کېږي.
وروسته د ننګرهار د کرنې ادارې رییس مولوی عبدالستار محمد او د کانال رییس مولوی غلام الرحمن کظیم او دغه راز د لغمان د کرنې اداری رییس مولوی محمد ولي محسن هم په خپلو خبرو کې د ځنګلونو په اهمیت رڼا واچوله او زیاته يې کړل، چې ځنګلونه زموږ د ښه چاپېریال زمانت کوي او همدا ځنګلونه او شنې بوټې دي، چې انسانانو ته اکسیجن برابروي، نو باید خپل چاپېریال شین وساتو او د ځنګلونو او شنو بوټو د وهلو څخه ډډه وکړو.
په اخیر کې د ټولو قومي مشرانو څخه ژمنه هم واخیستل شو چې هیڅوک نشي کولاي شنه لرګې خرڅ کړي او یا يې بل ځای ته انتقال کړي او یا هم په ځنګل کې شنې ونې قطع کړي.
