کونړ کې پر یوشمېر بزګرانو شنې خونې ووېشل شوې

دکونړ دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې «اف.اې.او» په مالي او د افغانستان دکلیو د بیارغونې مؤسسې«آر.آر.اې.اې» په تخنیکي همکارۍ ددې ولایت په مرکز او د سرکاڼو او وټپور ولسوالیو کې پر یوشمېر بزګرانو ۳۷ شنې خونې وېشل شوي دي.
ددغو شنوخونو په وېش غونډه کې د کونړ دکرنې، اوبولګولو او مالدارۍ رییس پیر حبیب الرحمن له مرستندویو مؤسسو څخه مننه وکړه، چې ددې ولایت له بزګرانو او مالدارانو سره مرستې او همکارۍ کوي او ټولو مرستندویو مؤسسو ته ډاډ ورکړ، چې د کونړ دکرنې ریاست او سیمه ییزه اداره له دوی سره هر اړخیزه همکاري کوي.
ددغو شنوخونو د وېش موخه د بېوزله بزګرانو ملاتړ، د دوی اقتصادې ودې ته زمینه برابرول او په ټوله کې د کال په ټولو فصلونو کې تازه سابه او ترکارۍ ته د خلکو لاس رسۍ ښودل شوی دی.