کونړ کې د کرنیزو محصولاتو مدیریت د پروژو چارې د بشپړېدو په درشل کې دي
۲۵ تله ۱۳۹۹
په نږدې راتلونکې کې به په کونړ کې د کرنیزو محصولاتو مدیریت اړوند د ۱۱۰ پروژو چارې بشپړ او ګټې اخیستنې ته به وسپارل شي. دغه پروژې د برخمن شویو بزګرانو په لس سلنې ونډې سره د نږدې ۴۳ میلیونه افغانیو په لګښت پلي کیږي.
په دغو پروژو کې د پیازو ۴۰ او د کچالو ۴۰ صفر انرژۍ زېرمتونونه جوړول او د سبو او مېوو ۳۰ وچوونکي لمریز دستګاوې وېشل شامل دي.
د کرنې وزارت د کرنیزو محصولاتو مدیریت د پروژې له لارې سږکال د هېواد په ډېرو ولایتونو کې د پیازو او کچالو د خوندي کولو په پار د پیازو او کچالو صفر انرژۍ سړې خونې «زېرمتونونه»، ممیزخونې او د مڼو صفر انرژۍ سړې خونې جوړ کړي دي او ترڅنګ یې د مېوو او سبو وچوونکي لمریز دستګاوې هم وېشلي دي.
