کونړ کې د کب روزنې د ترویج په پار هڅې کړندي شوې

کونړ کې د کب روزنې چارې او فارمونه د ودې په حال کې دي او په تېرو څو کلونو کې په دغه ولایت کې د کبانو روزنې ډېر شمېر فارمونه جوړ شوي دي.
د کرنې، اوبولګولو او مالدارۍ وزارت په دې ولایت کې د کب روزنې د ترویج او دودولو په پار د کب روزنې د ګڼ شمېر فارمونو د جوړولو ترڅنګ ددې ولایت له کب روزونکو سره هر اړخیزې تخنیکي او مالي مرستې او همکارۍ کړي دي. ددغو مرستو او همکارویو په دوام داځل دکونړ ولایت په څوکۍ ولسوالۍ کې د ۲۲،۴ میلیونه افغانیو په لګښت د ګرمو اوبو ماهیانو د بچیو د تولید هچري او ۲۰ بابه د ماهیو یوجریبه فارمونه جوړ او ددې ولایت د چارواکو په شتون کې رسماً پرانیستل شول.
په هغه غونډه کې، چې په همدې موخه جوړه شوې وه د کونړ والي عبدالستار میرزکال، د کونړ دکرنې رییس انعام الله ساپی، د ولایتي شورا رییس خان مشواڼی او ددې ولایت یو شمېر چارواکو، قومي مشرانو او ځوانانو ګډون درلود.
د کونړ د کرنې رییس انعام الله ساپی وویل، چې د کرنې وزرات له خوا ددې ولایت د کبانو روزنې د فارم لرونکو د ملاتړ او په دې ولایت کې د کب روزنې د ترویج په پار د ۲۲،۴ میلیونه افغانیو په لګښت د ګرمو اوبو ماهیانو د بچیو د تولید د هچري، چې د ۲.۲ میلیونه د ماهیانو بچیو د تولید وړتیا لري او د کب روزنې ۲۰ بابه یو جریبه فارمونه چې هر یوه یې د دوه زره کبانو د روزنې وړتیالري جوړ او رسماً پرانیستل شول.
د کونړ د کرنې، ابولګولو او مالدارۍ ریاست چارواکي وایي، چې په ۱۳۹۸ یم کال کې په دې ولایت کې د کبانو روزنې د فارمونو د پراختیا په پار یوشمېر پروژې په پام کې نویل شوي دي، چې په دغو پروژو کې پر فارم لرونکو د کبانو بچي وېشل او د کبانو روزنې نوي فارمونه جوړول شامل دي.
ښاغلی ساپی وویل، چې خلکو ته د کاري فرصتونو برابرولو او د کورنیو اقتصادي پیاوړتیا په پار په پام کې ده، چې په دې ولایت کې د کبانو ډېر شمېر فارمونه جوړ شي.
په افغانستان کې د کب روزنې د فارمونو شمېر څه باندې دوه زرو ته رسیږي، چې ډېری یې په کندهار، هلمند، ارزګان، ننګرهار، لغمان، بلخ او نیمروز ولایتونوکې شتون لري او له دغو فارمونو څخه په کال کې څه باندې ۱۰ زره ټنه کبان تولیديږي.