کندهار کې نږدې ۱۳۰ زره څاروي د ریخک او پروتوزوایي ناروغیو پر وړاندې واکسین شوي
۱۷ لړم ۱۴۰۴ هـ.ش
۱۷ جُمَادَى الأول ۱۴۴۷ هـ.ق
د کندهار د کرنې، اوبولګولو او مالدارۍ ریاست د هڅو په نتیجه کې، د اروپایي ټولنې په مالي ملاتړ او د هالنډ کمیټې په تخنیکي همکارۍ د کندهار په لسو ولسوالیو کې ۱۲۸ زره او ۳۵۰ کوچني څاروي د لیونتوب (ریخک) او پروتوزوایي ناروغیو پر وړاندې وقایوي واکسین شوي دي.
یاد کمپاین چې د درېیو اوونیو په اوږدو ترسره شو، په ترڅ کې یې ۸۵ زره او ۶۰۰ کوچني څاروي د چنجیو پر ضد درمل شوي او ۴۲ زره او ۷۵۰ نور د څارویو د لیونتوب (ریخک) ناروغۍ پر وړاندې واکسین شوي دي. دا واکسینونه د کندهار په پنجوايي، میوند، ارغستان، سپین بولدک، خاکریز، ارغنداب، دامان، ډنډ، غورک او نېش ولسوالیو کې د سیمې د ثبت شویو کلینیکونو لهخوا په هر څاروي ۲ افغانۍ لګښت سره تطبیق شوي دي.
د کندهار د کرنې ریاست د معلوماتو له مخې، د یاد وقایوي کمپاین موخه د ژمي له راتګ سره د پروتوزوایي ناروغیو مخنیوی، د مالدارۍ سکتور ته سالمه وده او پراختیا ورکول، د ناروغیو د رامنځته کېدو دمخه وقایوي تدابیر نیول او د مالدارانو اقتصادي ملاتړ دی.
مالداران د دې کمپاین له پلي کېدو خوښي څرګندوي او وایي، د کرنې ریاست او د هالنډ کمیټې لهخوا ورته په مهمو وختونو کې د وقایوي واکسینونو او درملو برابرول د دوی لپاره ستره مرسته ده. دوی هیله څرګنده کړه، چې دا ډول وقایوي پروګرامونه دې په راتلونکي کې هم دوام ومومي.
د یادونې وړ ده، چې د کندهار د کرنې ریاست په هڅو او د ملګرو ملتونو د خوړو او کرنې ادارې «اف.اې.او» په مالي ملاتړ، په دې وروستیو کې د ۸۰ زرو کوچنیو څارویو لپاره د طاعون ناروغۍ د مخنیوي وقایوي کمپاین هم بشپړ شوی دی.
