کندهار کې د کانګو تبې د مخنیوي په موخه درې زره فارمونو کې وقایوي کمپاین ترسره شو

د کندهار د کرنې، اوبولګولو او مالدارۍ ریاست د ملګرو ملتونو د خوړو او کرنې ادارې «اف اې او» په مالي ملاتړ او د مسلکي پاراوټرنرانو په تخنیکي همکارۍ، د کانګو تبې د مخنیوي په موخه یو پراخ وقایوي کمپاین تر سره شو. دغه کمپاین د کندهار ښار په ۱۵ ناحیو او شپږ ولسوالیو کې ترسره شوه، چې له مخې یې نږدې درې زره فارمونه تر وقایوي درمل پاشنې لاندې ونیول شول.
دغه کمپاین د کندهار د کرنې، اوبولګولو او مالدارۍ ریاست په هڅو، د ملګرو ملتونو د خوړو او کرنې نړۍوالې ادارې «اف اې او» په مالي ملاتړ او د مالدارۍ آمریت د مسلکي پاراوټرنرانو په تخنیکي همکارۍ، د کانګو تبې د مخنیوي په موخه تر سره شوې ده.
دغه کمپاین د کندهار ښار ترڅنګ د ارغنداب، دامان، پنجوايي، لوړ میوند، کښته میوند او سپین بولدک ولسوالیو ته هم غځول شوي وه، چې په ترڅ کې یې نږدې ۳۰۰۰ غواګانو فارمونه تر وقایوي درمل پاشنې لاندې ونیول شوه.
د درمل پاشنې ټولې چارې د ۱۵ تنه مسلکي پاراوټرنرانو له‌خوا عملي شوي، چې دوی ته د ملګرو ملتونو د خوړو او کرنې ادارې له لوري نظري او عملي روزنه ورکړل شوې او اړوند تجهیزات هم ورسپارل شوې وه، ترڅو د وقایوي کمپاین چارې په معیاري او مؤثر ډول ترسره شي.
د دې وقایوي کمپاین موخه، د څارویو د ساتنې چاپېریال پاک ساتل، د مالدارۍ سکټور ته سالمه وده ورکول، د ویروسي تبې (کانګو) د خپرېدو مخنیوی، د واښو سپوږدو له منځه وړل او مالدارانو ته د وقایوي خدماتو لاسرسی برابرول دي.
د کندهار د کرنې ریاست له‌خوا د څارویو روغتیا ته ځانګړې پاملرنه کېږي. شاوخوا یوه اونۍ وړاندې هم، د یاد ریاست په ابتکار د کندهار ښار په یو شمېر ناحیو او ولسوالیو کې ۴۶۰ فارمونو ته د کانګو تبې د مخنیوي لپاره وقایوي درمل پاشنه ترسره شوې وه.