کندهار کې د څارویو د درملو شرکتونه او پلورنځۍ وڅارل شول

د کندهار د کرنې، اوبو لګولو او مالدارۍ ریاست تر رهبرۍ لاندې، د مالدارۍ آمریت مسؤلینو د څارویو د بې‌کیفیته، غیري قانوني، تر وخت تېر درملو او د څارویو د درملو شرکتونو او پلورنځیو د جوازونو د څارنې په موخه یو ورځنی پراخ کمپاین ترسره کړ. دغه کمپاین کندهار دکرنې ریاست د مالدارۍ آمر حافظ حمیدالله په مشرۍ ترسره شو.
د کندهار د کرنې ریاست د مالدارۍ آمریت آمر حافظ حمیدالله، وویل: «د کمپاین پر مهال د څارویو د درملو د ګڼ شمېر شرکتونو او پلورنځیو څخه څارنه وشوه. د څارنې پر مهال د درملو کیفیت، د تولید او پای نېټه، د واردولو اسناد او د شرکت جوازونه وکتل شول.» نوموړي زیاته کړه، چې د ګڼ شمېر شرکتونو او پلورنځیو مسؤلینو ته سپارښتنه وشوه، چې د درملو په پلور کې د قانوني جواز درلودل د هر درمل پلورونکي لپاره اړین دي.
دغه راز ددې څارنې پر مهال یوشمېر تر وخت تېر درمل هم راټول شوي دي.
د کمپاین پر مهال د څارویو د درملو له ټولو شرکتونو غوښتنه وشوه، چې د کرنې او مالدارۍ وزارت د اصولو مطابق د فعالیت جواز ترلاسه کړي، د خپلو شرکتونو له درملو څخه تر وخت تېر او غیرقانوني درمل په بشپړ ډول لرې کړي او د کرنې او مالدارۍ وزارت د اصولو او معیارونو سره سم عمل وکړي.
همدارنګه ټولو شرکتونو او درمل پلورنځیو ته خبر ورکړل شو، چې تر راتلونکې یکشنبې پورې دې خپل فعالیتونه د کرنې وزارت د معیارونو سره برابر کړي او د پلورنځیو لپاره د کرنې وزارت رسمي جوازونه ترلاسه کړي، ترڅو په راتلونکي کې د ځنډ او خنډ سره مخ نه شي.
د دغه کنټرول موخه د بې کيفيته او تاريخ تېرو درملو  پلور مخنیوي، په خپل سر د هټيو پرانیستل او د غير قانونې درمل او واکسینونو د واردولو مخنيوي دی. دغه څارنې او ارزونې ددې لامل کیږي چې، درملتونونه او د وترنرۍ د برخې فعالین خپلو مشتریانو ته معیاري او په ښه کیفیت برابر چوپړونه وړاندې کړي.