کندهار کې د صادراتي محصولاتو د اسنادو د طی مراحل کولو واحد مرکز پرانیستل شوه

naim.rezai
سه‌شنبه ۱۴۰۰/۳/۱۱ - ۱۵:۲۷
کندهار کې د صادراتي محصولاتو د اسنادو د طی مراحل کولو واحد مرکز پرانیستل شوه

۱۱ غبرګولی ۱۴۰۰
د کرنې، اوبولګولو او مالدارۍ وزارت، د سوداګرۍ او صنعت او د مالیې وزارتونه او دغه راز د صادراتو په چارو کې د ولسمشر د سلاکارۍ دفتر، په ګډه د جمهوري ریاست د حُکم پر اساس، د لومړي ځل لپاره د کندهار په ولایت کې د صادراتي محصولاتو د اسنادو د طی مراحل کولو واحد مرکز پرانیستل.
یاد مرکز د دوشنبې په ورځ د غبرګولي په ۱۰مه، د کرنې وزارت د اوبولګولو او طبیعي سرچینو مرستیال حشمت الله غفوري، د صنعت او سوداګرۍ وزیر نثاراحمد غوریاني، د کورنیو تولیداتو د پیاوړتیا په برخه کې د ولسمشر ستر سلاکار جلال الدین سعید، د مالیې وزارت مرستیال عالم شاه‌ ابراهیمي او د کندهار والي روح‌الله خانزاده له خوا رسماً پرانیستل شوه.
حشمت الله غفوري وایي، چې یاد مرکز د صادراتو په برخه کې د اسانتیاوو په پار جوړه شوې ده. د ښاغلي غفوري په خبره، د افغانستان د صادراتو تر ټولو لوی اقلام کرنیز محصولات دي، او په کندهار کې د یاد مرکز جوړېدل کولی شي، چې د کرنیزو محصولاتو د صادراتو د لړۍ په ښه والي کې ډېرې مرستې وکړي.
د کرنې وزارت د اوبولګولو او طبیعي سرچینو مرستیال وویل: «سوداګرو او صادروونکو لپاره د اسانتیاوو برابرولو په پار اړتیا دا وه، چې ټول هغه شعبات، چې صادراتي اسناد یې طی مراحل کول، تر یوه چتر لاندې راشي. اوس دا شعبات د کندهار د سوداګرۍ او پانګونې په خونه کې تر یوه چتر لاندې راغلي دي.»
حشمت الله غفوري په ټینګار سره وویل، تر دې وروسته اړتیا نشته چې سوداګر د خپلو اړوندو صادراتي محصولاتو د طی مراحل کولو په پار مختلفو ادارو ته مراجعه وکړي او خپل وخت ضایع کړي.
دغه راز د کندهار والي روح‌الله خانزاده، هم د یاد مرکز په پرانیست غونډه کې وویل، چې په کندهار کي د سوېل لوېدیځې حوزې په کچه د صادراتي محصلاتو د اسنادو د طی مراحل کولو واحد مرکز په پرانیستلو سره به د کندهار او ددې زون په سوداګرۍ او صادراتو کي په پراخه کچه زیاتوالی راشي او سوداګرو ته به اسانتیاوې رامنځته شي.
 ښاغلی خانزاده وویل، ددې مرکز پرانیستل، د سوداګرو د صادراتو پروسه چټکوي، د فساد مخنیوی کوي او کاغذ‌پراني له منځه وړي.
په همدې حال کې، د صنعت او سوداګرۍ وزیر نثاراحمد غوریاني هم په خپلو څرګندونو کي وویل، ولسمشر محمد اشرف غني په هېواد کې د سوداګرۍ پراختیا ته ځانګړې پاملرنه لري او زیاته یې کړه، چې په همدې موخه یې په ځانګړې لارښوونې سره د صادراتي محصلاتو د اسنادو د طی مراحل کولو واحد مرکز د لومړي ځل لپاره په کندهار کي پرانیست، چې په دې سره به د کندهار او سوېل لوېدیځې حوزې د ټولو سوداګرو هغه ستونزې، چي په صادراتو کي یې درلودې له منځه ولاړي شي.
ښاغلی غوریاني زیاته کړه، له دې وروسته دې ته ورته نور مرکزونه به هم د هېواد په نورو زونونو کي پرانیزي، چې په ترسره کېدو سره به یې هېواد کې سوداګري په پراخه کچه پرمختګ وکړي.
په ورته وخت کې، د کورنیو تولیداتو د پیاوړتیا په برخه کې د ولسمشر ستر سلاکار جلال الدین سعید د صادراتي محصولاتو د اسنادو د طی مراحل کولو واحد مرکز جوړول د هغو سوداګرو د هڅو پایله وبلله، چې کلونه ـ کلونه یې د هېواد په هر ډول حالاتو کي افغاني تولیدات نړیوالو بازارونو ته رسولي دي.
ښاغلی سعید وویل، چې د کورنیو محصولاتو د صادراتو لړۍ د ښه والي په پار حکومت نورې اسانتیاوې هم برابروي.

تازه ترین اخبار

پنجشنبه ۱۴۰۳/۱/۹ - ۱۳:۳۴
Background image

هلمند کې د پستې نیالګیو تولید په پارهڅې، د پستې زرګونه نیالګي تولیدېږي

۹ وری ۱۴۰۳ه‍.ش
۱۸ رَمَضانُ المُبارَک ۱۴۴۵ه‍.ق
د هلمند ولایت د کرنې، اوبولګولو او مالدارۍ ریاست لخوا، د طبیعي سرچینو آمریت اړوند د مرکز لښکرګاه د بولان د نیالګیو روزنځای کې د پستې   پنځه. . .

پنجشنبه ۱۴۰۳/۱/۹ - ۱۳:۲
Background image

ننګرهار کې  ۷۲ زره څارویو ته د چنجیو ضد درمل  او واکسینونو د تطبیق چارې پیل شوې 

۹ وری ۱۴۰۳ه‍.ش
۱۸ رَمَضانُ المُبارَک ۱۴۴۵ه‍.ق
د ننګرهار د کرنې، اوبولګولو او مالدارۍ ریاست په هڅو دافغانستان لپاره د هالینډ کمیټې له لورې د ننګرهار ولایت په ۱۳ ولسوالیو کې څارویو ته د. . .

پنجشنبه ۱۴۰۳/۱/۹ - ۱۳:۱
Background image

ننګرهار کې پر زرګونو مالدارانو د څارویو خوراکي توکي وېشل کېږي 

۹ وری ۱۴۰۳ه‍.ش
۱۸ رَمَضانُ المُبارَک ۱۴۴۵ه‍.ق
د ننګرهار دکرنې، اوبولګولو او مالدارۍ رییس مولوی عبدالستار محمد د اکشن اېډ مؤسسې او هلال هډ،ا کرنیز شرکت چارواکو سره په کتنه کې د یادو. . .

بازگشت