کندز کې ۸۰ تنه د سبو کروندګر له کرنیزو بستو څخه برخمن شول
د سبو د تولید د ملاتړ او د کروندګرو د معیشت د ښه والي په موخه د کندز په مرکز او د چهاردرې په ولسوالی کې ۸۰ تنه د سبو کروندګرو ته کرنیزې بستې ووېشل شوې. دغه بهیر د ډاکار دفتر له خوا د کندز ولایت د کرنې، اوبو لګولو او مالدارۍ ریاست سره په همغږۍ کې عملي شو.
یاد پروګرام هغو کروندګرو ته ځانګړې شوې وې، چې له دې وړاندې یې د کورنیو بڼګیو پروژه په بریالۍ توګه تطبیق کړې وه، او د نوو کرنیزو بستو وېش د هماغو فعالیتونو په دوام، د تولید د کچې د لوړولو، د شته ځمکو د غوره استفادې او د کورنیو لپاره د سالمو سبو د برابرولو په موخه ترسره شو.
د یادونې وړ ده، چې دغه پروګرام د کورنیو د اقتصادي وضعیت په پیاوړتیا او په سیمهییزه کچه د سبو د کرکیلې د پراختیا لپاره د کروندګرو د هڅونې په برخه کې مهم رول لري.
