کندز کې د مني کمپاین په ترڅ کې ۳۰۰ تنو ته د بادام او شفتالو بڼونه جوړول
۲۷ لیندۍ ۱۴۰۴ هـ.ش
۲۷ جُمَادَى الثاني ۱۴۴۷ هـ.ق
د کندز د کرنې، اوبولګولو او مالدارۍ ریاست چارواکي وایي، چې په دې ولایت کې د بڼوالۍ د تولیداتو د پیاوړتیا او د کروندګرو د ژوند د ښهوالي په موخه، د مني کمپاین په چوکاټ کې د «ډاکار» دفتر لهخوا د کندز ولایت د کرنې، اوبو لګولو او مالدارۍ ریاست سره په همغږۍ، ۳۰۰ تنو لپاره د بادام او شفتالو بڼونه په چهاردرې، قلعه ذال او د کندز ولایت په مرکز کې جوړ شوي دي.
دغه برنامه د کندز د کرنې ریاست د کارکوونکو په تخنیکي نظارت او حضور کې عملي شوه، او هر ګټې اخیستونکي ته اصلاح شوي د بادام او شفتالو نیالګي ووېشل شول او په ټاکل شوې یوه جریبه ځمکه کې کرل شوي دي. د دې کمپاین موخه د کروندګرو عاید زیاتول، د معیار سره سم بڼوالۍ پراخول او د کرنیزو ځمکو ښه استفاده بلل شوی دی.
د یادونې وړ ده، چې د داسې پروګرامونو تطبیق د کرنې اقتصادي ودې، د کاري فرصتونو رامنځته کولو او د کروندګرو د کورنیو د اقتصادي وضعیت د ښهوالي په برخه کې مهم رول لري، او دا لړۍ په راتلونکي کې هم دوام لري.
