کابل ولایت کې د بېکیفیته او تاریختېرو حیواني درملو سوځول
۸ سلواغه ۱۴۰۴ه.ش
۹ شَعبان المُعَظّم ۱۴۴۷ه.ق
د کابل ولایت د کرنې ریاست د دې ولایت په څوارلسو ولسوالیو او ۲۲ ناحیو کې د ۱۷۶ حیواني کلینیکونو او ۲۱ حیواني درملتونونو د کنټرول او څارنې په پایله کې، شاوخوا ۲۰ زره قلمه بېکیفیته او تاریختېر حیواني درمل راټول او وسوځول.
د یاد ریاست مسؤلینو وویل، چې د بېکیفیته او منقضي شویو درملو د راټولولو او سوځولو موخه د حیواني درملو پلورونکو کنټرول او د کابل ولایت په مرکز او ولسوالیو کې څارویو لپاره د زیان رسوونکو درملو د پلور مخنیوی دی.
د کابل ولایت د کرنې رییس قاري محرابالدین بلال په دې اړه وویل، چې له درمل پلورونکو څخه غوښتل کېږي باکیفیته درمل تولید یا وارد کړي او همدارنګه مالداران دې د درمل او واکسین د پېرلو پر مهال د هغې نېټې او کیفیت ته جدي پاملرنه وکړي.
همدارنګه د کابل د کرنې ریاست د مالدارۍ آمر حجاز احمد صالحي څرګنده کړه، چې یاد درمل د کابل له بېلابېلو ولسوالیو او ناحیو څخه تر پراخ کنټرول وروسته راټول او د بیا کارونې د مخنیوي په موخه وسوځول شول.
په همدې حال کې، د کابل د کرنې ریاست د مالدارۍ د برخې یو متخصص ډاکټر حنیفالله عمر خبرداری ورکړ، چې د تاریختېرو درملو کارول پر حیواناتو جدي منفي اغېزې لري او آن کولای شي د هغوی د تلف کېدو لامل شي.
د کرنې، اوبو لګولو او مالدارۍ وزارت چارواکي ټینګار کوي، چې په مرکز او ولایتونو کې د حیواني او نباتي درملو د کنټرول هڅې دوام لري، تر څو د بېکیفیته او تاریختېرو درملو د پلور مخه ونیول شي.
