هلمند کې پر یوشمېر بزګرانو د سبو اصلاح شوي تخمونه او کیمیاوي سرې ووېشل شول
۷ کب ۱۴۰۱ه.ش
۵ شَعبان المُعَظّم ۱۴۴۴ ه.ق
د هلمند ولایت د کرنې، اوبولګولو اومالدارۍ ریاست له خوا مخکې د ډاکار(DACAAR) مؤسسې په مالي همکارۍ د ګرشک ولسوالی د تاجکانو او نورزایي سیمو ٦٥ تنو بزګرو ته د سبو پسرلني اصلاح شوي تخمونه وېشل شوي وو چې نن ورځ یادو بزګرو ته کیمیاوي سرې هم ووېشل شوې.
د یادو مرستو په لړ کې هر بزګر ته یو کیلو ګرام د بینډیو ، ١٠ګرامه د تورو بانجانو، ٦٠ګرامه د رومیانو اصلاح شوي تخمونه وېشل شوي وو چې په تعقیب یې نفر ته ٥٠کیلوګرامه سپینه او ٢٥کیلوګرامه توره سره هم ووېشل شوه.
د نوموړې ولسوالی د کرنیزو خدمتونو مسوول بزګرو ته سپارښتنې وکړې چې د ترلاسه شویو اصلاح شوو تخمونو په ښې روزنې او پالنې کې د کرنې ادارې اړوند فني او مسلکي کارمندانو لارښؤنې په پام کې ونیسي تر څو د قناعت وړ حاصلات ترلاسه کړي.
د یادولو وړ ده، چې یادو بزګرو ته د نوموړو تخمونو د کرکیلې په اړه عملي او نظري پوهاوی هم ورکول شوي دي.
