هلمند کې د کرنیزو درمل پلورونکو او کاروباریانو مرکزونو معیاري کولو په موخه د جوازونو وېش لړی پیل شوه
۱۳ کب ۱۴۰۱ه.ش
۱۱ شَعبان المُعَظّم ۱۴۴۴ ه.ق
دهلمند ولایت د کرنې، اوبولګولو او مالدارۍ ریاست لخوا په دې ولایت کې د نباتي درمل پلورنځیو د معیاري کولو په موخه پر شرایطو برابرو کسانو ته د کار کولو جوازونه ورکول کېږي.
په همدې موخه ددې ولایت د کرنې ریاست لخوا یوه ګډه کمېټه ټاکل شوې ده، چې مشري ېې ددې ریاست مرستیال مولوي زین الله زاهد په غاړه ده تر څنګ یې د کرنیزو چارو آمریت اړوند د بوټیو ساتنې مدیریت مدیر ماسټر نجیب الله حکیمي او اړونده کارکوونکي شتون لري.
د یادې کمېټې لخوا هلمند کې ټول نباتي درملتونونه د کرنې وزارت د ځانګړې تګلارې له مخې په فني او مسلکي ډول را جوړېږي، ترڅو باکیفیته خدمات وړاندې شي، د غیر مسلکي کسانو، بې جوازه کاروباریانو او تر وخت تېر او بې کیفیته درملو مخه به هم ونیول شي.
دهلمند د کرنې ریاست هڅه کوي چې د خصوصي سکتور د پیاوړتیا لپاره د هر ډول مرستې او همکارۍ زمینه برابره کړي ترڅو په دې برخه کې ځمکوال او بڼوال د بهبود پر لور ولاړ شي او له دې لارې د باکیفیته خدمتونو څخه برخمن شي.
د یادولو ده، چې په هلمند کې نږدې ۱۱۷ بابه حیواني او نباتي درملتونونه موجود دي چې تر دې مهاله یې د هلمند د کرنې ریاست یوشمېر پر شرایطو برابرو مراکزو ته د کار جوازونه ورکړی دی او د پاتې نورو کسانو لپاره هم د طرزالعمل مطابق جوازونه ورکول کېږي.
ددې پروسې موخه هلمند کې د یاد مرکزونو معیاري او په مسلکي شرایطو برابرول، ترڅو بزګرو او مالدارو ته معیاري او مسلکي خدمات وړاندې او په راتلونکي کې د غیر مسلکي اشخاصو او نورو احتمالي خطراتو مخه ونیول شي .
