هلمند کې د کب روزنې سکټور پراختیا په پار هڅې؛ دکبانو ۴۸ زره بچې روزل کېږي

هلمند کې د کب روزنې فارمونه د ودې په حال کې ده او په تېرو څو کلونو کې په دغه ولایت کې د کبانو روزنې ډېر شمېر فارمونه جوړ شوي او د کبانو روزنې ته د خلکو لیوالتیا زیاته شوې ده، چې په همدې برخه کې لسګونه نوي فارمونه جوړېږي او ګڼو خلکو ته پکې د کار او روزګار زمینه برابره شوې ده. 
د هلمند دکرنې، اوبولګولو او مالدارۍ ریاست چارواکي وایي، چې د هلمند ولایت مرکز لښکرګاه کې د خصوصي سکټور د کب روزنې د یو شرکت له لوري شاوخوا ۴۸ زره د کبانو بچي د روزنې په موخه هلمند ته را انتقال شوي وو چې د کرنې ریاست د مالدارۍ او حیواني روغتیا آمریت د مسؤلینو د لارښؤنې سره سم فارمونو ته واچول شول.
یاد کبان تر خوشې کېدو مخکې، د حیواني روغتیا او مالدارۍ آمریت د مسلکي کارکوونکو له خوا روغتیايي معاینات او د نسل ارزونه پرې ترسره شوه، څو د ناروغیو مخنیوی وشي او د سالم نسل وده یقیني شي.
دکب روزنې دغه فارمونه د کرنې ریاست اړوند د مالدارۍ او حیواني روغتیا آمریت کارمندانو د مسلکي لارښؤنو مطابق له وړاندې رغول شوي دي، چې وخت پر وخت یې مسؤلینو ته لازمې لارښونې او سپارښتنې ترسره کېږي.
د یادونې وړ ده، چې دا هڅې د کب روزنې صنعت د ودې او د خوړو خوندیتوب د پیاوړتیا په موخه ترسره کېږي، او تمه ده چې په راتلونکې کې به د کبانو تولید زیات او پر بازار مثبته اغېزه ولري.