هلمند کې د نشهيي توکو پر وړاندې د بدیل معیشت عامه پوهاوي غونډه وشوه
۲۹ لړم ۱۴۰۳هـ.ش
۱۷ جُمَادَى الأول ۱۴۴۶هـ.ق
د هلمند ولایت کرنې، اوبولګولو او مالدارۍ ریاست لهخوا، د کرنې وزارت په لارښوونه او مالي ملاتړ، د مرکز لښکرګاه سټار هوټل په تالار کې د عامه پوهاوي یوه ستره غونډه جوړه شوه.
په دې غونډه کې د کرنې ریاست مسؤلینو، د ولایت مقام استازو، د امارتی ادارو مسؤلینو، بزګرانو، بڼوالو او د هلمند سلګونو اوسېدونکو ګډون کړی و.
د کرنې، اوبولګولو او مالدارۍ رئیس مولوي نیازمحمد وهاج د غونډې پر مهال د نشهيي توکو کرکیلې د زیانونو او ګټورو نباتاتو کرنې د ګټو په اړه ګډونوالو ته مفصل معلومات وړاندې کړل. نوموړي د معیشت بدیل پروګرامونو په ترڅ کې د نويو کرنیزو خدمتونو د پلي کېدو خبر ورکړ او د اینجې د کرنې او شنو خونو پروژو ژر پیل ته خپله ژمنتیا څرګنده کړه.
په غونډه کې د بېلابېلو ادارو مسؤلینو هم ویناوې وکړې او د کرنې سکتور د ودې لپاره خپل وړاندیزونه وړاندې کړل. د غونډې په وروستۍ برخه کې ګډونوالو خپلې غوښتنې او وړاندیزونه مسؤلینو ته وړاندې کړل، چې هغوی د هر اړخیزې همکارۍ ډاډ ورکړ.
دا غونډه د هلمند ولایت د کرنې سکتور د ودې او د نشهيي توکو پر وړاندې د بدیل معیشت رامنځته کولو په برخه کې یو مهم ګام ګڼل کېږي.
