هلمند کې د مالټو نوي بڼونه جوړېږي
۱۳ کب ۱۴۰۳ه.ش
۳ رَمَضانُ المُبارَک ۱۴۴۶ه.ق
د هلمند د کرنې، اوبولګولو او مالدارۍ ریاست له لوري د ددې ولایت په مرکز لښکرګاه او ګڼو ولسوالیو کې د مالټو د ونو بڼونو جوړولو چارې پیل شوي دي.
د هلمند ولایت دکرنې ریاست چارواکي وایي، چې په دې ولایت کې د مالټو بڼونو د پراختیا او ترویج په پار د یاد ولایت د والي په هلو ځلو دجلال اباد ولایت څخه ۲۱۰۰ اصله نیالګي راوړل شوي دي، چې دکرنې ریاست د څېړنیز فارم ترڅنګ به انارباغ ، د ولسوالیو قوریه جاتو او ګڼو بزګرانو ته د بڼونو جوړولو په موخه ورکړل شي.
دیادې پروسې د پیل پر مهال د هلمند د کرنې ریاست د کرنیزو چارو آمر احمد محب، د تخمونو تصدیق ورکولو آمر انجنیر امان الله تسکین، د څېړنیز فارم مدیر عبدالرحمن خاکسار او د ترویج عمومي مدیر قاري مسلم تر څنګ نورو مامورینو هم حضور درلود.
د مالټو یاد نیالګي چې اصلاح شوي او د ٧٠٠٧ په نوم یادیږي ، هلمند کې به ورڅخه پیوند اخیستل کېږي او په نارنجو کې به لګول کېږي ترڅو دا ولایت د مالټو له بڼونو څخه برخمن شي.
د یادولو وړ ده، چې د هلمند د کرنې ریاست هڅه کوي تر څو د نوو ارزښت لرونکو نیالګیو کرنې، ترویج او تکثیر په برخه کې لا زیات کار وکړي.
هلمند د هېواد یو له کرنیزو ولایتونو څخه دی د کرنیزو چارو پوهان په دې باور دي چې دا ولایت د کرنې او بڼوالۍ لپاره ډېرې ښې ځمکې او مناسبه هوا لري او که ترې سمه ګټه واخیستل شي نو په دې سره به د ډېرو هغو محصولاتو او مېوو اړتیا په کور دننه پوره شي چې له نورو هېوادونو را واردېږي.
