۲۵ چنګاښ ۱۳۹۹

د هلمند د کرنې، اوبولګولو او مالدارۍ ریاست چارواکي وایي، چې د هلمند د کرنې ریاست اړوند د بولان په څېړنیز فارم کې د غنمو د مورني تخمونو دتولید په موخه مورني تخمونه کرل شوې وه، چې اوس یې د پروسس لړۍ پیل شوې ده.

د هلمند د کرنې، اوبولګولو او مالدارۍ رییس زلمی الکو وایي، چې په دې ولایت کې د غنمو د اصلاح شوي تخمونو د تولید په موخه د غنمو بېلابېل ډولونه یا ورایټۍ کرل شوې وه، چې له دغو غنمو څخه به د غنمو مورني تخمونه تر لاسه شي. دهغه په خبره د غنمو دغه مورني تخمونه به دهغو شرکتونو په واک کې ورکړل شي، چې د اصلاح شوي تخمونو د تولید په برخه کې د فعالیت جواز لري.

په هلمند کې د غنمو د اصلاح شوي تخمونو په تولید سره یاد ولایت د تصدیق شوي تخمونو له اړخه ځان بساینې ته نږدې کیږي.

د هلمند دکرنې رییس وایي دوی هلې ځلې کوي، چې په هلمند ولایت کې د بېلابېلو نباتاتو تخمونه اصلاح او تکثیر کړي تر څو د بزګرو کرنیز محصولات د کمیت او کیفیت له پلوه ښه او د بزګرو او ځمکوالو د اقتصادي ودې لامل شي.