هلمند کې د سویابینو کرکېله

۴ زمری ۱۴۰۱ ه‍.ش
۲۷ ذوالحجَّة ۱۴۴۳ ه‍.ق
د هلمند ولایت د کرنې، اوبولګولو او مالدارۍ ریاست په هلو ځلو د تغذیې او زده کړې نړیوالې موسسې «NEI» په مالي همکارۍ ددې ولایت د مرکز لښکرګاه په کډون په یوشمېر ولسوالیو کې پر ۳۰۰ بزګرانو  سویابینو اصلاح شوي تخمونه، تور او سپینه سره وېشل شوي دي.
د هلمند دکرنې ریاست چارواکي وايي، چې د هلمند په ولایت کې د سویابینو د رواجولو او پراختیا په پار بزګرانو ته د زده کړو ترڅنګ د سویابینو اصلاح شوي تخمونه او کیمیاوي سرې ورکول شوي، چې د اړتیا وړ تخممونه او کیمیاوي سرې د تغذیې او زده کړې نړیوالې موسسې «NEI» له خوا چمتو شوي دي او ددې ولایت ۳۰۰ مخکښو کرونده ګرو ته وېشل شوي دي .
د هلمند دکرنې ریاست ددې زمینه هم برابره کړې ده، ترڅو د یادې ځمکې څخه د سویابینو راټول شوي محصولات به بېرته د همدې موسسې له لارې له بزګرو څخه وپېرل شي.
څېړنو ښودلې چې هلمند ولایت کې دسویابینو کښت ښه حاصل ورکوي.
د هلمند د کرنې ریاست هڅه کوي، چې هلمند کې سویابین ترویج کړي او په راتلونکو کلونو کې دالړۍ نوره هم وغځوي او د ولایت په کچه ترې ټول ځمکوال برخمن کړي.
د سویابینو کرکېله په ۲۰۰۳ ام کال کې دود شوې ده، چې اوس په یو مهم کرنیز توکي بدل شوې او د هېواد په ډېرو ولایتونو کې کرل کېږي. د کرنې، اوبولګولو او مالدارۍ وزارت د سویابینو د ترویج او پراختیا په پار په مرکز او ولایتونو کې بزګرانو ته د سویابینو ننداریزې کروندې جوړ کړي دي او پر یوشمېر بزګرانو د سویابینو اصلاح شوي تخمونه او اړونده توکي وېشلي دي.
سویابین بشپړه پروتیني او مغذي مواد لري او د کورنیو په روغتیا په ځانګړي ډول د ماشومانو د خوارځواکۍ په مخنیوی کې رغنده رول لري.